top of page

Jagadguru Sri Kanchi Sankaracharya's Anugraha Bhashanam at Amul Dairy, Anand -Key Highlights

3 days ago
2 min read

அற்புதம் அம்மம்மா அற்புதம். பகவான் கிருஷ்ண லீலையில் வர்ணிக்கப் பெறும் கோகுலம் போல் ஏராளமாக பால் உற்பத்தி செய்யும் அமுல் நிறுவனத்தில் பூஜனீயர்கள் எழுந்தருளியபோது அனுக்ஹபாஷணம். வெள்ளை (தூய) உள்ளத்திலிருந்து எழும் வார்தத்தைகளின் ஒவ்வொரு அக்ஷரமும் பீஜாக்ஷரமே. ஒவ்வொரு சொல்லும் மந்திரமே. நாம் அனைவரும்உணருவோமா?


குஜராத் மாநிலம் ஆனந்தில் உள்ள அமுல் தொழிற்சாலையில் பூஜ்யஶ்ரீ காஞ்சி சங்கராச்சாரியார் ஸ்வாமிகளின் அனுக்ரஹ பாஷணம் – சிறப்பம்சங்கள்


1. துஷ்டியும் புஷ்டியும் - பாரத கலாசாரத்தின் ஒருங்கிணைந்த வாழ்க்கைமுறை


லலிதா ஸஹஸ்ரநாமத்தில் வரும் “துஷ்டி:புஷ்டி:மதி:த்ருதி:” என்ற நாமங்களைக் குறிப்பிட்ட பூஜ்யஶ்ரீ பெரியவா, ‘துஷ்டி’ என்பது மகிழ்ச்சியையும், ‘புஷ்டி’ என்பது ஊட்டச்சத்துக் குறைபாடின்றி உடல் ஆரோக்கியத்துடன் இருப்பதையும் குறிக்கிறது என்று விளக்கினார்கள். பால், தயிர், வெண்ணெய், நெய் போன்றவற்றின் ஊட்டச்சத்து முக்கியத்துவத்தையும் எடுத்துரைத்தார்கள். பாரத கலாசாரம் ஒன்றோடொன்று தொடர்புடையதாகவும், ஒன்றையொன்று சார்ந்ததாகவும், ஒருங்கிணைந்ததாகவும் அமைந்திருப்பதைச் சுட்டிக்காட்டினார்கள்.


2. ஏகாக்ரதையும் தவமும் - மகான்கள் வழங்கிய அறிவுச் செல்வம்


உலக வாழ்க்கையில் மற்றவர்களுடைய ஒத்துழைப்பு அவசியமானது. ஆனால் தியானம், தவம், தத்துவ சாதனை ஆகியவற்றிற்கு ஏகாந்தமும் மன ஒருமைப்பாடும் தேவை. ஆயுர்வேதம், ஜோதிடம், அந்தரிக்ஷ சாஸ்திரம், சங்கீதம், நாடகம் போன்ற துறைகளில் மகான்கள் உலகிற்கு வழங்கிய அறிவுச் செல்வங்கள் அவர்களுடைய தவத்தாலும் ஏகாக்ரதையாலும் கிடைத்தவை என்று பூஜ்யஶ்ரீ ஸ்வாமிகள் எடுத்துரைத்தார்கள்.


3. அமுல் இயக்கம் - சுதந்திரத்திற்கு முன்பே தொடங்கிய உலகப் புகழ்பெற்ற முயற்சி


பாரத சுதந்திரத்திற்கு முன்பே கேடா கூட்டுறவு ஸ்தாபனத்தின் மூலம் தொடங்கப்பட்ட அமுல் இயக்கம், எண்பது ஆண்டுகளாக வளர்ந்து உலகப் புகழ்பெற்றிருப்பதைப் பூஜ்யஶ்ரீ பெரியவா பாராட்டினார்கள். ஒரு கோவிலின் கர்ப்பகிரகத்தைச் சுற்றி மண்டபம், சிகரம், அன்னதானம், சத்சங்கம் போன்ற அமைப்புகள் இருப்பதைப் போல, பாலில் தொடங்கிய அமுலின் பணிகள் பல்வேறு உணவுப் பொருட்களுக்கும் சேவைகளுக்கும் விரிவடைந்திருப்பதாக விளக்கினார்கள். மற்ற மாநிலங்களில் கூட்டுறவு நிறுவனங்கள் உருவாகவும் இது பிரேரணையாக அமைந்துள்ளது என்று குறிப்பிட்டார்கள்.


4. இயற்கை, விவசாயம், விஞ்ஞானம் - ஒருங்கிணைந்த முன்னேற்றம்


சைவ உணவு முறை, பசுமை ஆற்றல், இயற்கைக்கு மரியாதை ஆகியவை பாரதத்தின் வாழ்க்கை முறையோடு தொடர்புடையவை. விவசாயிகளுக்குப் பயன்படும் வகையில் நவீன விஞ்ஞானத்தின் மூலம் உணவுப் பொருட்களைப் பாதுகாக்கும் தொழில்நுட்பங்களை அமுல் உருவாக்கி வருவதைப் பாராட்டிய பூஜனீயர்கள், அடிப்படை விஞ்ஞானத்தில் முதலீடு செய்வதும் தொழில்துறையை வளர்ப்பதும் மக்களிடம் அறிவையும் செல்வத்தையும் கொண்டு சேர்க்க அவசியம் என்று தெரிவித்தார்கள்.


5. நல்ல சிந்தனை, நல்ல நிர்வாகம், நல்ல தலைமை


முன்னாள் குடியரசுத் தலைவர் டாக்டர் அப்துல் கலாம் அவர்கள் காஞ்சிக்கு அருகிலுள்ள கிராமத்தில் சேவை செய்ததையும், உணவுப் பதப்படுத்துதல் குறித்துப் பேசியதையும் பூஜ்யஶ்ரீ பெரியவா நினைவுகூர்ந்தார்கள். ‘புண்யாத்மா, புண்ய அதிகாரி, புண்ய நேதா’ என்ற மூன்று கருத்துகளை விளக்கி, நல்ல எண்ணங்கள் கொண்ட மனிதர்கள், அனைவரையும் ஒன்றிணைக்கும் நிர்வாகிகள், நல்ல சங்கல்பத்துடன் செயல்படும் தலைவர்கள் ஆகியோரின் அவசியத்தை வலியுறுத்தினார்கள்.


6. அமுலின் முன்னோடிகளும் காஞ்சி மடத்தின் விருதும்


அமுல் இயக்கத்திற்குப் பிரேரணையாக விளங்கிய சர்தார் வல்லபபாய் படேல், விஞ்ஞானத் துறையில் பங்களித்த டாக்டர் குரியன், டாக்டர் தலாயா ஆகியோரைப் பூஜ்யஶ்ரீ ஸ்வாமிகள் குறிப்பிட்டார்கள். பெரியவாளின் பெயரில் ஆண்டுதோறும் அரசியல், சமூக சேவை, பக்தி, விஞ்ஞானம் ஆகிய துறைகளில் வழங்கப்படும் ‘சந்திரசேகரேந்திர சரஸ்வதி நேஷனல் எமினென்ஸ் அவார்டு’ விருதை டாக்டர் குரியன் பெற்றபோது, மும்பை ஷண்முகானந்தா அரங்கில் அவரைச் சந்தித்ததையும் நினைவுகூர்ந்தார்கள்.


7. கோசம்ரக்ஷணம் - காஞ்சி மகான்களின் சங்கல்பம்


பசுக்களைப் பாதுகாப்பது அரசியல் சாசனத்திலும் ஒரு நோக்கமாக இடம்பெற்றிருப்பதைக் குறிப்பிட்ட பூஜ்யஶ்ரீ பெரியவா, அதனை நடைமுறைப்படுத்த அரசாங்கத்தின் சட்டங்களோடு, நிறுவனங்களின் பங்களிப்பும் பொருளாதாரச் சாத்தியமும் அவசியம் என்றார்கள். பூஜ்யஶ்ரீ சந்திரசேகரேந்திர சரஸ்வதி மஹாஸ்வாமிகள், பூஜ்யஶ்ரீ ஜயேந்திர சரஸ்வதி ஸ்வாமிகள் ஆகியோரின் உறுதியான சங்கல்பங்களை நிறைவேற்ற விவசாயம், விஞ்ஞானம், தர்ம சம்பத்து, ஐசுவரியம் ஆகியவற்றை ஒருங்கிணைத்துச் செயல்பட வேண்டும் என்று எடுத்துரைத்தார்கள்.


8. நாட்டின் கடைக்கோடி மக்களுக்கும் ஊட்டச்சத்தான உணவு - ஆசியுரை


உலகிற்கே முன்னுதாரணமாக விளங்கும் அமுல் நிறுவனம், வெளிநாடுகளிலும் விரிவடைவதோடு, பாரதத்தின் கிராமங்களிலும் கடைக்கோடி மக்களுக்கும் பாதுகாப்பான, பக்கவிளைவுகளற்ற, ஊட்டச்சத்து நிறைந்த உணவை வழங்க வேண்டும். மேலும் பலரை ஒன்றிணைத்து, நல்ல உணவு, நல்ல சிந்தனை, ஐசுவரியம் ஆகியவை அனைவருக்கும் கிடைக்கச் செய்ய வேண்டும். நிறுவனத்தின் சங்கல்பங்கள் செயல்திட்டங்களாக நிறைவேறப் பகவானிடம் பிரார்த்தனை செய்வதாகக் கூறி, ஜகத்குரு ஶ்ரீ காஞ்சி சங்கராச்சாரியார் அவர்கள் அனைவருக்கும் ஆசி வழங்கினார்கள்.

bottom of page